Ertakchi
Maxfiylik siyosati
Amalda: 2026-yil 9-oktabrdan
Bu hujjat Ertakchi xizmati (ertakchi.maisa.uz sayti va Telegram'dagi @ertakchiuzbot boti, shu jumladan uning Mini App ilovasi) qanday ma'lumotlarni yig'ishi, ulardan nima maqsadda foydalanishi va sizda qanday huquqlar borligini tushuntiradi.
1. Qanday ma'lumotlarni yig'amiz
| Ma'lumot | Qayerdan olinadi |
|---|---|
| Telegram akkaunti: ID raqami, ism, username, profil rasmi havolasi | Botni ishga tushirganingizda yoki Mini App'ni ochganingizda Telegram beradi. Telefon raqamingiz va yozishmalaringizni olmaymiz. |
| Buyurtma mazmuni: bolaning ismi, yoshi, qiziqishlari va shu kabi siz yozgan ma'lumotlar, o'zingiz yozgan matn, tanlangan kayfiyat va til | Siz (ota-ona yoki bolaning yaqini) o'zingiz kiritasiz. |
| Natija: yaratilgan ertak matni va audio fayl | Xizmat yaratadi. |
| To'lovlar: to'lov summasi, vaqti, Click tranzaksiya raqami, balans tarixi | Click to'lov tizimi xabar beradi. Karta raqami va boshqa karta ma'lumotlari bizga kelmaydi — ular faqat Click sahifasida kiritiladi. |
| Texnik ma'lumotlar: IP manzil, brauzer va qurilma turi, tashrif vaqti, ochilgan sahifalar, ilovadagi asosiy harakatlar | Saytga yoki ilovaga kirganingizda avtomatik yoziladi. |
| Reklama manbai: qaysi reklama havolasi orqali kelganingiz (kampaniya kodi) | Havoladagi parametrdan olinadi. |
2. Nima uchun ishlatamiz
- Ertak matni va audiosini yaratish hamda sizga yetkazish.
- Balansni yuritish, to'lovlarni qabul qilish va yaratilmagan ertak uchun pulni qaytarish.
- Bot orqali xizmatga oid xabarlar yuborish: to'lov qabul qilindi, ertak tayyor, xatolik yuz berdi.
- Xizmatni yaxshilash: qaysi bosqichda foydalanuvchilar to'xtab qolayotganini va qaysi reklama samarali ekanini tushunish.
- Suiiste'mol va firibgarlikning oldini olish.
Ma'lumotlaringizni sotmaymiz va reklama tarqatish uchun uchinchi shaxslarga bermaymiz.
3. Kimlar bilan bo'lishamiz
Xizmat ishlashi uchun ma'lumotning faqat zarur qismi quyidagi tashkilotlarga uzatiladi:
- Google (Gemini modellari) — ertak matnini yozish va uni ovozlashtirish uchun buyurtma mazmuni (bolaning ismi, yoshi, qiziqishlari, siz yozgan matn) yuboriladi. Telegram akkauntingiz ma'lumotlari yuborilmaydi.
- Click — to'lovni amalga oshirish uchun to'lov summasi va ichki buyurtma raqami.
- Telegram — sizga xabar va tayyor audio faylni yetkazish uchun.
- Meta (Facebook/Instagram) — agar reklama o'lchovi yoqilgan bo'lsa, saytga tashrif va to'lov hodisalari (shaxsiy matnlarsiz) Meta Pixel orqali uzatiladi.
Qonunda belgilangan hollarda vakolatli davlat organlarining rasmiy so'roviga binoan ma'lumot taqdim etilishi mumkin.
4. Ertakni ulashish va umumiy bo'lim
Har bir tayyor ertakning ulashish havolasi bo'ladi: shu havolani olgan har kim ertakni to'liq tinglay oladi va matnini ko'ra oladi. Havolani kimga yuborishni o'zingiz hal qilasiz; sahifa qidiruv tizimlariga chiqarilmaydi.
Ertak sukut bo'yicha umumiy «Ertaklar» bo'limida ham ko'rinadi: u yerda bolaning faqat ismi, ertak nomi va qisqa ko'rik parchasi ochiq bo'ladi, to'liq ertakni esa sotib olgan odamgina tinglaydi. Matnda shaxsiy tafsilot (familiya, manzil, bog'cha yoki maktab nomi, sog'liq haqida ma'lumot) borligini tizim aniqlasa, ertak umumiy bo'limga qo'yilmaydi. Ertak sahifasidagi «Hammaga ochiq» belgisini o'chirib, uni istalgan payt yashirishingiz mumkin.
5. Qancha vaqt saqlaymiz
- Akkaunt, buyurtmalar, ertaklar va balans tarixi — akkauntingiz mavjud bo'lgan davrda.
- To'lov yozuvlari — buxgalteriya va soliq qonunchiligi talab qilgan muddat davomida.
- Texnik ma'lumotlar (tashriflar va ilovadagi harakatlar jurnali) — 90 kun, so'ng avtomatik o'chiriladi.
6. Qurilmangizda saqlanadigan ma'lumot
Sayt brauzeringiz xotirasida (localStorage) quyidagilarni saqlaydi: tizimga kirganingizni tasdiqlovchi kalit, tasodifiy tashrifchi identifikatori, reklama kampaniyasi kodi va to'ldirilayotgan formaning qoralamasi. Bular xizmat ishlashi uchun kerak; brauzer ma'lumotlarini tozalasangiz o'chadi (qayta kirish talab qilinadi).
7. Sizning huquqlaringiz
- Biz sizga oid qanday ma'lumot saqlayotganimizni so'rash.
- Noto'g'ri ma'lumotni tuzattirish.
- Akkauntingizni, buyurtmalaringiz va ertaklaringizni o'chirtirish. To'lov yozuvlari qonun talab qilgan muddatgacha saqlanadi.
- Botni bloklash orqali xabarlarni olishni to'xtatish.
So'rov yuborish uchun @ertakchiuzbot botiga yozing. So'rovlarga 10 ish kuni ichida javob beramiz.
8. Xavfsizlik
Ma'lumotlar shifrlangan aloqa (HTTPS) orqali uzatiladi va kirish cheklangan serverda saqlanadi. Parol so'ramaymiz: kirish Telegram orqali tasdiqlanadi. Shunga qaramay, internet orqali uzatishning mutlaq xavfsizligini hech bir xizmat kafolatlay olmaydi.
9. Bolalar haqidagi ma'lumot
Ertaklar bolalar uchun yaratiladi, lekin xizmatdan kattalar — ota-onalar va bolaning yaqinlari foydalanadi; akkaunt ochish va to'lov qilish 18 yoshdan kichiklarga mo'ljallanmagan. Bola haqida siz kiritgan ma'lumot (ismi, yoshi, qiziqishlari) faqat ertak yaratish uchun ishlatiladi, reklama uchun ishlatilmaydi va sotilmaydi. Ertak uchun bolaning ismi va bir-ikki qiziqishi kifoya — familiyasi, manzili, bog'cha yoki maktab nomi, sog'lig'i haqidagi ma'lumotlarni kiritmang. Ertakni va unga bog'liq ma'lumotlarni o'chirtirish uchun bizga yozing.
10. O'zgarishlar
Bu siyosat yangilanishi mumkin. Muhim o'zgarishlar haqida bot orqali xabar beramiz; amaldagi matn doim shu sahifada turadi.